Debatt
APPLAUS: I dag er det mykje applaus i kristne forsamlingar. Anten det høver eller ikkje, skriv innsendar Odd Dubland.
Bjørn Olav Hammerstad
Inflasjon i applaus
Eg er ikkje imot applaus. Men eg vil likså vel applaudera for dei som ulønt vaskar golvet på bedehuset framfor dei som står på plattforma.
Sist langfredag såg eg på NRK ei gudsteneste der tre personar bytte på å lesa om Jesu liding og krossfesting. Det er ein lang alvorleg tekst og det høver ikkje med ei lang preik i tillegg.
Då opplesinga var ferdig applauderte kyrkjelyden. Kven applauderte dei for? For han som vart pint i hel på korset? Eller for opplesarane? Eg tykte applausen var malplassert. Det er visse stunder som er så kjenslemessig krevjande at ein ikkje skal avreagera med klapping.
I dag er det mykje applaus i kristne forsamlingar. Anten det høver eller ikkje. Det er mest gått inflasjon i det. Kanskje du spør om eg er imot applaus. Nei, det er eg ikkje.
