Vern Vebjørn Sands fredsprosjekt!

Det er ikkje så ofte vi grip tak i saker som sirkulerer i hovudstadens indre liv, men for «Roseslottet» bør vi gjera eit kraftfullt unnatak. Når Plan- og bygningsetaten i Oslo er i ferd med å sparka bein under eit av landets mest håpefulle fredsprosjekt midt i ei tid for rykte om krig, er det uforståeleg og umusikalsk.

Den praktfulle og eigenarta kunstinstallasjonen ved Frognerseteren er nemleg av nasjonal interesse. Har du ikkje teke med deg familien din på tur opp dit når du er i Oslo, bør du gjera som 400 000 andre har gjort sidan det opna i 2020. Få det med deg.

Dette er kunst for små og store. For skuleklasser. Kunst for folk som ikkje er kunstkjennarar. Det er kunst rett ut til folket. Brukskunst, kan vi kanskje kalla det. Men motsett av slireknivar og rosemåla sleiver, er dette ein brukskunst som aktiverer samfunnsengasjement.