NY SJANSE: Biskop Thomas er glad Gud gav han ein ny sjanse. Og det han tenkte på då koronasjukdommen gradvis slapp taket, var rettferd: – Viruset rammar både fattige og rike. Men medan fattige døyr i det stille av covid-19, utan store overskrifter, får rike god omsorg, god behandling og god tilgang til helsetenester, seier han.
Illustrasjonsfoto: Dagen-arkiv
Rettferd sett frå sjukesenga
Den egyptiske biskop Thomas var i haust så hardt ramma av covid-19 at han førebudde seg på å døy. Glad for at Gud gav han ein ny sjanse, er appellen hans at vi må forsterka kampen for rettferd.
Biskop Thomas har lenge vore ei modig stemme for den koptiske minoriteten i Egypt, og han har inspirert mange nordmenn med spiritualitet og eit liv i teneste for rettferd og likeverd.
I Egypt var det i august akkurat blitt slutt på forbodet mot å ha gudstenester under pandemien. Også i bispedømet El Qusseia sør i Egypt var folk glade for å møtast i kyrkjene igjen, men til mindre samlingar enn før.
Søndagsgudstenestene vart delte opp og spreidde utover fleire dagar for at alle som ville, skulle kunne koma. Onsdag 12. august leia biskop Thomas «søndagsgudstenesta». Så brått fall han saman, midt i liturgien. Biskopen svima av framfor eit par–tre hundre menneske.
