| I Fokus
Dårleg dømmekraft
GUDS ORD GIR DØMMEKRAFT: Kjærleiken til Gud og hans ord gjer oss rike på dømmekraft og innsikt, skriv Erling Thu.
Adobe Stock
Folk er sjokka. Avsløringane står i kø. Det ser ut til at folk i høge stillingar har gjort ting dei ikkje burde ha gjort.
«Dårleg dømmekraft», sa statsministeren. «No er det tid for sanning. Vi treng ikkje bortforklaringar. Alt må no leggjast på bordet.» Men det er ikkje berre no det er tid for sanning. Det er alltid tid for sanning. Det er aldri rett å snakka usant.
«Dårleg dømmekraft», er no på alle lepper. Så kjem fordømminga. Alle tek avstand. Det er lite forståing og lite nåde. Det er god dømmekraft å ikkje fella dom før alt er i lyset, før vi kjenner samanheng, motiv og faktiske hendingar. No er det altfor mykje vi ikkje veit.
