Gir ikkje etter for bioteknologi-press
- Det er ikkje ein livsrett å få ungar, seier Liv Signe Navarsete.
Sp-leiaren reknar partiets stans av endring av bioteknologilova som ein stor siger for partiet denne våren.
Liv Signe Navarsete er godt nøgd med Senterpartiets innsats i den raudgrøne regjeringa. No gjentek ho samstundes invitasjonen til KrF om å bli med.
Artikkelen fortsetter under annonsen.
- No har vi sete i åtte år med Ap og SV, og fått til gode resultat for landet vårt. Vi ønskjer å fortsette med dei i neste periode, og eg skulle gjerne invitert KrF med, seier ho til Dagen.
På ein pressekonferanse på Stortinget onsdag oppsummerte ho partiets største sigre denne våren: Nasjonal transportplan, jordbruksoppgjeret og kommunebudsjettet for 2014.
Overfor Dagen trekker ho fram fleire siger-saker:
- Kyrkjeforliket, det vi fekk att på selskapsskatten, ei pakke på skog - og vi har verdisaker der eg meiner at Senterpartiet er veldig viktig inn i regjeringa og har drege ho i rett retning, skryt Navarsete.
- Kunne ikkje tape saka
Ho understrekar at det er Senterpartiet i regjering som har ivareteke at kyrkja skal få fleire prestar og at vi følgjer trusopplæringa.
- Vi er eit verdiparti som er opptekne av verdiane i politikken, seier Navarsete.
- Kva med at de stoppa revisjonen av bioteknologilova, der Ap og SV ville opne for å gjere tidleg ultralyd til eit offentleg tilbod, og opne for eggdonasjon?
Artikkelen fortsetter under annonsen.
- Det var ein veldig stor siger for oss. Det forslaget som låg der kunne vi rett og slett ikkje stått for i regjering. Vi må sjølvsagt tole å tape enkelte saker, men det var ei sak vi ikkje kunne tape, seier partileiaren.
Arbeiderpartiet sa tidlegare i vår til Dagen at dei reknar med at dei vil få gjennom revisjonen uansett. Navarsete avviser at Ap skal få ho til å skifte meining om den saka.
- Eg trur ikkje dei vil tvinge dette gjennom, fordi eg trur dei veit kor viktig denne saka er for oss. Vi kjem til å gå beinhardt i mot det.
Ullen på valtap
Navarsete trur det er ei veksande skepsis blant folk mot å «tukle med skaparverket» slik dei raude partia ønskjer.
- Det er ikkje ein livsrett å få ungar, ikkje alle får det, og det er ikkje sikkert at alle skal få det. Vi skal ikkje tøye grensene, seier Navarsete.
Sp-leiaren har slite med låge meiningsmålingar over lengre tid. Under pressekonferansen i går stilte fleire spørsmål ved kva Senterpartiet vil gjere dersom dei tapar haustens stortingsval.
Det ville ikkje partileiaren svare klart på.
Artikkelen fortsetter under annonsen.
- Dette er ikkje eit tema i partiet. Vi har éin ambisjon. Det er å vinne valet og fortsette i regjering, sa Navarsete.
Inviterer KrF med
Samstundes som ho igjen rekker ut ei hand til KrF, er ho skeptisk til Venstre, som ho meiner er blitt eit høgreparti.
- I økonomisk, nærings- og distriktspolitikk ser vi at dei er mykje samde med Høgre.
- Er Venstre gått ut av sentrum?
- Det skal eg ikkje seie, men dei har bevegd seg ganske mykje, seier Navarsete.
Dette vil Senterpartiet
Kjempe mot tvangssamanslåing av småkommunar.
Vidare vekst i landbruket. Trygg norsk mat. Sikre eit fornybart gjennombrot.
Vere garantisten for at det framleis blir ført distrikts- og regionalpolitikk neste år.
Ei rekke tiltak i nasjonal transportplan, som ferjefri E39 og E6 i Helgeland.
