Tome ord, svada og politikk

Språkrådet gjer mykje bra. No har dei laga ein svadagenerator. Denne generatoren er ei nyskaping til skrekk og åtvaring. Han viser i praksis korleis me ikkje bør ordleggje oss, anten me er folke­valde, byråkratar eller vanleg dødelege.

Svada er som kjent tome ord. Dei kan gjera seg godt i ordskifte. Det rette uforpliktande ordet kan stundom berga ein ut av vanskelege situasjonar.

Men når tome ord vert stilte saman i setningar, oppdagar me lettare meiningsløysa. Språkrådet har sett opp ein mal som er avslørande: Seks kolonnar med moteord, der alle substantiv kan koplast med alle verb, slik at setningane høyrest intelligente og imponerande ut.