| I fokus
Tid for misjon
TILGJENGELEG: Han ber oss i denne adventstida om å gjera oss tilgjengelege i nabolaget, på skulen og arbeidsplassen – midt mellom vanlege menneske som lengtar og leitar – utan heilt å kunna seia kva dei lengtar etter, skriv Erling Thu.
Adobe Stock
Vi er midt i advent og vi ventar på han som kom for mange år sidan, han som kjem til oss kvar einaste dag med ny nåde og skal koma attende for å dømma levande og døde. Han, som kom, var sendt med eit oppdrag som han fullførte ved å senda læresveinane sine ut til misjon. Han sender framleis sine tenarar til å utrusta alle dei heilage til teneste så dei òg kan sendast ut.
Vi ventar på dagen når basunen skal lyda og han skal senda ut englane sine for å samla dei utvalde til seg. Lukkeleg er dei som Herren finn i arbeid når han kjem attende.
Jesus sa ofte om seg sjølv at han var sendt og omtalte Far som «Han som har sendt meg». Jesus er den apostelen – utsendingen – som vi vedkjennast. Hans apostoliske oppdrag er mellom anna å utrusta, myndiggjera og senda ut arbeidarar i sin haust. Ei apostolisk kyrkje er ei misjonskyrkje – eit sendande fellesskap av folk som er sendt og stadig sender.
