Tårevått frå Dagen

Kven blir den neste liberalteologen Dagen ukritisk skal opna spaltene sine for? Det er spørsmålet eg sit att med etter at avisa æra meg med eit svar på leiarplass, publisert på dagen.no 24. februar. 

Det handlar om at fire sider i laurdagsavisa, ei av tre vekentlege utgåver, var sett av til ein presentasjon av Gyrid Gunnes og dei teologiske synspunkta hennar. Overskrifta, «Presten som ba til Allah», oppsummerer godt noko av det mest kontroversielle som Gunnes står for – religionsblanding.

På Facebook undra eg meg over prioriteringa. Då det uvant nok vart debatt om innlegget mitt, utdjupa eg med å peika på at intervjuet framstod heilt umotivert.