| Debatt
Shoaib Sultan ufarleggjer islam
INTOLERANT RELIGION: I dag er det den muslimske verda som mest systematisk har institusjonalisert religiøs intoleranse, skriv Hallgrim Berg i eit svar til Shoaib Sultan th.
Arkiv / NTB
Shoaib Mohammad Sultan klagar meg (29.januar) for å ha selektiv moral i den historiske jamføringa av islam og kristendom. Eg vil returnera klagemålet med å hevde at han sjølv er meir selektiv enn nokon, då han som profesjonell propagandist lagar eit relativt «nøytralt» bilete av islam og vil innbilla folk at det ikkje finst nemnande skilnad i resultat og verknader av dei store religionane. Islam blir ufarleggjort.
Han vil, tvillaust – historisk og kontemporært – halda fram med å akademisera, dandera og relativisera alle fakta om islamistiske nedslaktingar, valds- og terrorrekordar på fire kontinent, undertrykking av kvinner og minoritetar, ideologisk fundamentalisme, manglande demokrati, struping av menneskerettar, osv.
Eg står fast ved at religionsgrunnleggjarane Jesus og Muhammed var så vidt forskjellige at kristenfunderte rettssamfunn i praksis har utvikla seg kvalitativt annleis enn dei 57 landa som har funne saman i Organization of Islamic Cooperation.
