Rektor på Bildøy og tenestedeling i ImF
Temaet menn og kvinners teneste er i seg sjølv utfordrande, og mindre utfordrande vert det ikkje når vi som organisasjonar driv verksemd som ikkje har klare parallellar i DNT.
Vel heime etter eit par etterlengta ferieveker, har eg sett gjennom bunken av Dagen, og vil svare på reaksjonane etter at styret for Bildøy Bibelskule konstituerte kvinneleg rektor for komande skuleår.
Då noverande rektor leverte si oppseiing, bestemte vi oss for å lyse ut stillinga. Skrifta seier jo: «Det er eit truverdig ord: Om nokon gjerne vil ha eit tilsynsembete, så er det ei god gjerning han har lyst til» (1.Tim.3:1), og i ei stor annonse spurte vi: «Har du lyst til å vere med å utruste unge menneske gjennom Guds ord?».
Artikkelen fortsetter under annonsen.
Til hausten har skulen over 90 studentar, og skuleanlegget vert no sett i god stand, så dette må vel vere ei stor og meiningsfull leiaroppgåve i Guds rike. Etter fire annonser i Dagen og fire i Vårt Land, hadde vi ikkje ein einaste seriøs søkjar. Basert på interne og eksterne forslag, følgde så veker med utfordring til mannlege kandidatar vi meinte var dugande til dei ulike kvalifikasjonane ei slik stilling krev, men utan resultat. Då må det vere lov å formidle det gamle ropet «Adam, kvar er du?»
Når vi opplever at menn ikkje tek ansvar, bør ein vinkle dette som ei rekrutteringsutfordring, i staden for å sette spørsmålsteikn ved ImF sin teologiske profil.
Ein rektor ved vår bibelskule skal ha åndeleg tyngde, identifisere seg med ImF sin læremessige profil, skal vere ein god personalleiar, skal kommunisere godt med studentane, og skal profilere skulen godt utad i møte med vårt misjonsfolk. I arbeidet med å rekruttere ny rektor, vil vi framover sjå på korleis ein kan få avlastning på det skulefaglege, økonomiske og administrative område, sjølv om dette formelle ansvar også her kviler på rektor.
Då sommarferien stod for døra, og vi visste at skulen treng ei tydeleg og god leiing frå hausten av, bad vi den av leiarane i ImF som totalt sett er best skikka, om å gå inn i stillinga frå hausten av. Av omsyn til kontinuitet for alle partar, fann vi det best å konstituere Aud Karin Kjølvik for eitt år, og vi er veldig takksame for at ho sa ja.
Teologi- eller leiarkrise?
Det vert så hevda at å konstituere ei kvinne inn i rektorgjerninga, er eit brot med ImF si historiske linje, og sender uklare teologiske signal utover i organisasjonen. Ville det ikkje vere betre å konstituere ein av bibellærarane, og ordne alt det administrative på anna måte?
Vi har dyktige bibellærarar ved skulen, men deira arbeidsplan er alt sprengt frå hausten, og det siste vi vil gjere er å gjere Bibelskulen til mindre bibelskule. Å konstituere ein bibellærar ville altså stort sett berre vere av formell karakter, utan endring av oppgåver. Spørsmålet er då: Skal vi tenkje einsidig på at nokon vert bekymra for ImF sin teologiske profil, eller skal vi gje tillit til ein av våre dyktigaste leiarar og gjere praktiske endringar i ein periode med konstituering? For ImF-styret og skulestyret var konklusjonen klar.
Organisering i ImF
Temaet menn og kvinners teneste er i seg sjølv utfordrande, og mindre utfordrande vert det ikkje når vi som organisasjonar driv verksemd som ikkje har klare parallellar i DNT. Konteksten i dei bibelske tekstane er hovudsakleg forholda i og rundt den lokale kristne forsamling, og derfor er det viktig for oss å ansvarleggjere våre forsamlingar til å ha gode strukturar som både tek det allmenne prestedøme og lære- og hyrdetenesta på alvor.
Når vi registrerer ei forkynning- og kallskrise, er det etter vårt syn mest ei lokal krise, og vi løyser ikkje den ved å sparke ansvaret oppover i systemet.
Artikkelen fortsetter under annonsen.
Utanom den lokale forsamling, har vi så i evangelisk fridom funne det tenleg å organisere arbeidet med krinsar og forbund, og vi har starta skular og andre institusjonar. Som ansvarleg leiing, bør vi då frå tid til anna vurdere om leiinga av dette er tenleg og bibelsk forankra i dag. Guds ord endrar seg ikkje, men t.d. for ein bibelskule er det andre krav, både i forhold til studentar og styresmakter, enn for berre få år tilbake.
Lære- og hyrdetenesta i ImF
Seinast i mai, hadde ImF sitt hyrderåd ein gjennomgang av nokre stillingar i organisasjonen, og sa at generalsekretær, krinsleiar og rektor ved bibelskolen har ein såpass tydeleg funksjon av lære-, hyrde- og tilsynsansvar inn mot lokale forsamlingar og verksemda ein leier, at desse stillingane kjem inn under Skrifta sitt ord: «Difor lyt ein tilsynsmann vera ulastande, mann til éi kvinne, edrueleg, visleg, verdig, gjestmild, dugande til å læra andre …» (1.Tim 3:2).
Når dette ansvaret er lagt på desse stillingane, vil vi samstundes understreke kor viktig det er å bygge gode leiarteam, der menn og kvinner arbeider saman og utfyller kvarandre. Vi vil oppmuntre til ein modell der ein har administrasjonsleiar i tillegg til generalsekretær/krinsleiar/rektor, slik at sistnemnde kan ha nok ressursar til å ivareta den utadretta verksemda.
Hyrderådet seier vidare at ein ikkje vil presse synet på tenestedeling i desse stillingane på ein slik måte at det heile vert kunstig og uhensiktsmessig. Konkret gjev Hyrderådet signal om at administrasjonsleiaren i ImF er assisterande generalsekretær, studieinspektør ved bibelskulen er assisterande rektor, og vi gjev det råd at administrasjonsleiar i krinsar er assisterande krinsleiar. Dette betyr ikkje at desse (uavhengig av kjønn) trer inn i alle funksjonar (f.eks. hyrderåd), men tek vare på den daglege leiinga av verksemda i dagleg leiars fråvær. Ved lengre fråvær, vil det verte ei vurdering som styret må ta, slik det er gjort no ved bibelskulen.
Komande år
Når ImF sitt hyrderåd seier at det ligg eit særskilt lære- og hyrdeansvar til stillinga som rektor ved bibelskulen, vert det knytt til denne institusjonen sin eigenart og rektors funksjon elles i organisasjonen. Læreansvaret vert særleg knytt til truslærefaget, noko som ikkje skal leggast på rektor komande skuleår. Rektor kan møte i ImF sine styremøte, men det er ikkje naturleg at rektor møter i hyrderådet.
Etter ferien vil ein også konkludere om korleis det åndelege ansvaret vert ivaretatt komande skuleår. Slik vil vi forplikte oss på dei bibelske ordningane, samstundes som vi søkjer praktiske løysingar for menn og kvinners teneste. For øvrig kan eg opplyse om at ImF etter sommaren vil ferdigstille eit dokument om menn og kvinners teneste.
Erik Furnes
generalsekretær i Indremisjonsforbundet