Modig forfattar om overgrep mot dei fastbuande ved Utøya

Det forferdelege massedrapet av ungdomar på politisk sommarleir på Utøya i juli 2011 er brent inn i nasjonens kollektive minne for all tid. 69 unge menneske fall for kuleregnet frå ein terrorist. Ein time tidlegare hadde han sprengt delar av regjeringskvartalet og teke livet av åtte menneske.

Gjennom aviser, bøker, film og reportasjar er folk landet rundt blitt godt kjende med udåden, redningsaksjonen, innsatsen frå frivillige, politiet si rolle, og seinare om rettssaka og fengselsopphaldet, seinskadar blant overlevande og etterlatne, og så vidare.

Men ei gruppe er gløymt: dei fastbuande grannane på Utstranda. Det var dei som fyrst kom seg ut i båtane, risikerte liv og helse i redningsarbeidet den 22. juli, men som i åra etterpå er neglisjerte, plaga og trakasserte. Storsamfunnet har snautt høyrt om lagnaden for desse familiane.