Debatt
BEREDT: Direktør Elisabeth Aarsæther (bildet) i Direktoratet for samfunnstryggleik og beredskap (DSB) oppmodar alle til å lesa brosjyren og til å styrkja eigenberedskapen sin.
DSB
Kvifor beredskapsbrosjyre i posten?
Mellom 28. oktober og 1. november får alle norske husstandar ein brosjyre i postkassa med råd om eigenberedskap.
Brosjyre på papir frå norske styresmakter? I 2024? Er det ikkje totalt utdatert? Det er i alle fall svært uvanleg, men heng med vidare, så skal du få svar.
Tidlegare i år oppdaterte DSB, i samarbeid med ei rekkje andre styresmakter, eigenberedskapsråda. Dei handlar om korleis innbyggjarane i Noreg bør førebu seg i tilfelle krise. Den største endringa er at vi tilrår at folk bør vera førebudde på å klara seg sjølve i éi veke. I 2018, då vi børsta støv av befolkningsråda, sa vi tre døgn.
I tillegg har vi i år teke inn nokre nye tema – felles eigenberedskap og psykisk helse i kriser – og vi har utvida råda om kritisk medieforståing og tilhaldsstader i kriser.
