Køyr varsamt!

Så langt i år har talet på dødsulukker dobla seg samanlikna med i fjor. Denne dystre trenden kan ikkje halde fram.

Også i år skal truleg mange oppleve Noreg frå vegen. Mange vil måtte rekne med tid til kø og venting. Dette er fordi det blir bygd svært mykje ny veg, og det blir jobba med å ta att store vedlikehaldsetterslep. Dette er eit resultat av dei mange prosjekt som Solberg-regjeringa sette i gong, men som enno ikkje er sluttført. Dei skal gje auka trafikktryggleik og redusert reisetid for bilistar over heile landet. Men det betyr altså at vi i ein periode må finne oss i vegarbeid langs vegane våre.

Diverre har vi i 2022 sett tal på dødsulukker som vi hadde håpa å kunne sleppe. Eit dødsfall i trafikken er eit dødsfall for mykje. Skal vi nå målet om ein nullvisjon må vegbygginga halde fram, nye vegar er sikre vegar, der tal ulukker vert betrakteleg redusert. Likevel er det nokre faktorar vi aldri kan ta høgde for som er årsaka til mange ulukker, nemleg rus og uoppmerksomheit. Her har vi sjølv eit ansvar.