Konstant ideologisk kamp mot NLA Høgskolen

NLA Høgskolen, som ofte vert omtalt som NLA og som tidlegare heitte Norsk Lærerakademi, synest å leva i ein konstant ideologisk kamp. Det er ein kamp som går tilbake til oppstarten av NLA. Det var ein trong fødsel – av ideologiske grunnar.

Kampen starta faktisk 20 år før opprettinga av NLA, ved at staten gjorde vedtak om å overta Oslo kristne lærerskole. Argumentet då var at staten skulle ha hand om all lærarutdanning, og med det forma lærarane i statens ideologiske form.

Det er grunnhaldninga i den ideologiske kritikken også no, men då i to versjonar. Den eine seier kort og godt at det er staten som skal stå for all lærarutdanning, og helst all utdanning frå barneskule til universitet. Den andre versjonen seier at det er greitt med privat lærarutdanning, berre ho er på statens premiss og etter statens mønster.