Gud inkarnerer, føyer saman, gjer heil. Ekskarnasjon går motsett veg.

Kristne flest er vel fortruleg med ordet «inkarnasjon», noko av det mest særprega og viktige ved den kristne trua, at Gud blei menneske i Jesus Kristus. Gud blei inkarnert, kom til oss «i kjøt» - in carne.

Filosofen Charles Taylor introduserer oss i den omfattande, men viktige boka A Secular Age for eit motsett ord, «ekskarnasjon», eit ord som han sjølv skapar, når har skal sette ord på noko avgjerande som pregar verdiane i vår sekulære tid, «ut av kjøt» - ex carne.

Taylor, som sjølv er katolikk, brukar ordet dels som kritikk av noko han meiner reformasjonen starta, der sakrament, faste, bønetider og livsriter fekk lavstatus som uviktig for det indre livet.