For dei levande, ikkje for dei døde

Biskop Herborg Finnset sin påstand om at bibelord om helvete er utgått på dato, har utløyst reaksjonar både på leiarplass og i fleire innlegg.

Det blir argumentert med at livet har to utgangar, med påstand at dette har brei forankring i Bibelen (leiarplass 19/10). Men eg ser ikkje dette fokuset i Guds ord. I alle fall står dette ikkje klart i Joh 3:16.36 slik Olav Kydland hevda 3/11. Tvert om strekar Joh 3:36 under at frelsa handlar om å sjå livet og ha evig liv; altso ikkje om livets utgang. Og Sal 68:21 talar om frelse som utgangar frå døden, ikkje som ein utgang frå livet.

Og i Joh 5:28–29 sa Jesus dette: « … For den timen kjem då alle dei som er i gravene, skal høyra røysta hans. Og dei skal koma ut – dei som har gjort godt, for å stå opp til livet, men dei som har gjort vondt, for å stå opp til dom.» Guds dom mellom gode og vonde skal altso skje i livet – ikkje utanfor livet, jf. òg Jesu ord om at Gud er Gud for dei levande, ikkje for dei døde (Mark 12:27).