Denne gamle salmen er ein god start på ein ny dag

Eg møtte aldri bestefar Peder på Ytre-Fure. Han døde i 1958, åtte år før eg vart fødd. Men eg veit at han var glad i å syngje salmar, og eg veit kva salmar han ofte song. Gjennom salmane og historiene som blir fortalde i familien, føler eg at eg kjenner han litt likevel.

Det blir sagt at bestefar min song, same kva han heldt på med.

«Kvitrende lerke som vårløfter fører», tralla han når vårsola blenkte i bakkane og dei første gule kusymrene dukka fram på lune plassar der nordavinden ikkje fekk tak.