Førstegrøda

Mykje skjedde i 1814. Langt borte frå Noreg, inne i Kanton i Kina, skreiv misjonær Morrison i dagboka si:

«Ved foten av ein høg bakke, vella det fram ei kjelde. Der kunne ingen sjå oss, og der døypte eg Tse A-ko i namnet til Faderen, Sonen og Den heilage Ande … Måtte han bli førstegrøda av ei stor innhausting, ein av dei millionane som skal tru og frelsast frå Guds vreide.»

To år etter kunne medarbeidaren Milne gjere det same. Han hadde besøkt Morrison i Kanton. Den unge kinesaren Leang Afa vart med han tilbake til Malakka. Han skulle hjelpe til i litteraturarbeidet. Snart vart også han døypt.