VINNAR AV STEFANUSPRISEN: I Vietnam sit advokaten og menneskerettsaktivisten Nguyen Bac Truyen (t.h.) fengsla på fjerde året.
Stefanusprisen til vietnamesisk advokat
Den fengsla juristen og menneskerettsforsvararen Nguyen Bac Truyen (52) frå Vietnam får Stefanusprisen 2020.
Sjølv sit prisvinnaren isolert i einecelle i ei høgtryggingsavdeling i Vietnam, dømt til 11 år i fengsel.
– Nguyen Bac Truyen har sett sitt eige liv og sikkerheita til familien i fare i sin kamp for rettane til menneske med ein annan tru enn sin eigen, seier Ingvill Thorson Plesner, leiar av komiteen som tildeler Stefanusprisen, i ei pressemelding.
Stefanusalliansen deler ut Stefanusprisen, som består av eit kunstdiplom og 10 000 euro, annan kvart år til ein eller fleire personar som har gjort seg særleg notert i kampen for trusfridom og menneskerettar.
