GRAVFERD: Fleire hundre israelarar samla seg til gravferda for babyen som døydde etter at mora vart skoten og han vart fødd prematurt.
Heidi Levine, AP/NTB Scanpix
Samla rundt ein død baby
Når islamistane feirar at ein baby er drepen, seier det meir enn vi vil vite om kva haldning dei har til fredeleg og respektfylt sameksistens.
«Hamas kunngjer med stor stoltheit dødsfallet til sin martyr Salih Omar Barghouti, som gjennomførte den heroiske Ofra-operasjonen».
Det skreiv den palestinske terrororganisasjonen på Twitter i går om mannen som vart skoten og drepen av israelske styrkar. Det er illustrert med ein smilande ung mann med skjegg. Bakgrunnen er til å bli kvalm av.
Heltemotet innebar nemleg å skyte mot menneske som stod på eit busstopp utanfor den israelske busetjinga Ofra søndag kveld. Dette var den åttande kvelden i den jødiske lysfesten hanukkah, då lysa skin som sterkast. Kontrasten til mørkret som råka tilfeldige sivile menneske som berre skulle reise med buss, vart desto sterkare.
