KRITIKK: Stefanusalliansen kritiserer regjeringa for ikkje å snakke offentleg om veksande forfylgjing av kristne og muslimar i India der hindunasjonalisten Narendra Modi er statsminister. Her frå besøket hans i Noreg nyleg.
Cornelius Poppe / NTB
Refsar Støre for å teie om forfylgjing i India
Den norske menneskerettsaktøren er sterkt kritisk til at forfylgjing av religiøse minoritetar i India ikkje ser ut til å ha vore framme under statsminister Modi si vitjing i Noreg.
Dei siste dagane har India sin statsminister, Narendra Modi, vore på rundreise i Europa, mellom anna for å styrke landet sitt handelssamband til fleire land, mellom dei Noreg.
I misjons- og menneskerettsorganisasjonen Stefanusalliansen reagerer ein på at trusfridomsspørsmål ikkje er trukke tydeleg fram i det offentlege av det norske vertskapet under hindunasjonalisten Modi si vitjing til Noreg.
I hans regjeringstid er det blitt mykje vanskelegare for religiøse minoritetar i verdas mest folkerike land, noko som vert understreka av ferske eksempel på vald og drap.
