BISKOP: – Det er ein ting å tenkje på at dette er trasig for meg. Men å tenkje «Kva kan eg bety for nokon andre no?», kan ofte vere det som gir mitt liv ei anna meining òg, seier Olav Fykse Tveit, biskop og preses i Bispemøtet.
Bo Mathisen/NPK
Preses om nedstengninga: – Vi føler det er tungt alle saman
Biskop og preses Olav Fykse Tveit beskriv ein koronatrøyttleik i samfunnet der det er vanskeleg for mange å ta noko initiativ. – Men vi kan prøve å oppmuntre kvarandre. Det kan bety noko, minner han om.
Olav Fykse Tveit vart vigsla som biskop og preses i Bispemøtet i Den norske kyrkja 25. mai 2020. Det var første søndagen etter at landet «stengde ned» i mars at det var lov med gudsteneste i det heile.
Til vanleg ville heile den majestetiske Nidarosdomen vore full med gjester frå heile verda. Men i staden var det 25 personar til stades, alle plasserte med koronatrygg avstand og dessutan koret og den tekniske staben til NRK. Fordi NRK var til stades, fekk han likevel nådd ut til mange med det han hadde på hjartet.
Store delar av det halvtanna året etter har han til liks med mange jobba heimanfrå, isolert frå omverda.
