Tidlegare fylkesleiar Dag Sele i Hordaland KrF er blant dei som no er medlem i Partiet Sentrum. Sele seier Sentrum er eit parti som tydeleg viser at framtida er like viktig dom notida. Foto: Marit Hommedal / NTB/ NPK
Partiet Sentrum vil inn på Stortinget
Sentrum har henta ei rekke røynde politikarar og vil stille med stortingslister i alle valkrinsane framfor valet i haust. Fleire av partistiftarane er klare på at stortingsplass er eit mål.
– Vi treng eit parti som har som hovudmål å skape ei berekraftig verd, og som kan medverke til at Noreg bidrar til dette fri frå band til ulike interesseorganisasjonar, svarer Sentrumspolitikar Tom Sverre Tomren på spørsmål frå Nynorsk pressekontor om kvifor han har valt å bli del av det nye partiet.
Tomren, som bur på Osterøy utanfor Bergen, er førsteamanuensis og prest og forskar til dagleg på miljøetikk, utdanning og berekraft, bistand og likestilling.
Tomren har tidlegare hatt verv i Miljøpartiet Dei Grøne (MDG) og forklarer partibyte med at partiet utvikla seg i ei retning som etter kvart vart umogleg å kombinere med menneskesynet hans.