ADVENTISTKYRKJE: Adventistane på Ulsrud leiger ut desse lokala til Messiaskirken i Oslo frå september av.
Tor Tjeransen
Lutheranarar flyttar inn i søndagsfri kyrkje
– Vi er begge blant dei mindre økumeniske forsamlingane på skalaen, seier pastoren for den norsk-lutherske forsamlinga.
Frå september av, flyttar Messiaskirken i Oslo gudstenestene sine frå Oslo sentrum til Adventistkirken på Ulsrud. Trass teologisk usemje, har dei kome fram til ei løysing.
Messiaskirken er avhengig av å leige dei røde dagane på formiddagstid. Det vil seie søndagar og heilagdagar. Adventistane held berre møte på laurdagar. Einaste gong det eventuelt vil overlappe er om 1. juledag fell på ein laurdag, men då flyttest møtet éin dag fram.
– No har vi forhandla om å få til ein kontrakt sidan mai og skal ferdigstille den i laupet av veka. Det har vore ein lang prosess. Adventistane er opptekne av sin tradisjon, medan vi er oppteken av vår. Vi er begge blant dei mindre økumeniske forsamlingane på skalaen, seier Eirik–Kornelius Garnes–Lunde, pastor i Messiaskirken i Oslo.
