Gruppesigeren glapp på overtid

Noreg U21 var i ferd med å stele gruppesigeren, men ein tabbe frå Arild Østbø fire minutt på overtid blei kostbar. Med 1- 1 ventar vinnaren av Nederland og Spania i semifinalen.

Tor Ole Skullerud gjorde heile ni endringar frå laget som slo England 3- 1 laurdag. Dei fire A-landslagsspelarane Håvard Nordtveit, Markus Henriksen, Joshua King og Valon Berisha var blant dei som blei kasta innpå i gruppefinalen mot Italia.

Offensivt fungerte svært lite for Noreg. Pasningsspelet og bevegelsane stemte ikkje. Italia skapte eit hav av sjansar, men Strømmen-keeper Arild Østbø varta opp med den eine praktredninga etter den andre.

Fullstendig mot spelets gang ordna kaptein Stefan Strandberg norsk leiing på straffespark etter 90 minutt. RBK-stopparen ordna sjølv straffa, etter at han blei riven ned i feltet. Han scora sikkert. Den norske benken gjekk bananas. Alt tyda på gruppesiger.

Fire minutt på overtid fekk omsider Italia ballen i mål. Østbø gjekk ut på eit innlegg, men nådde aldri ballen. Det gjorde derimot Andrea Bertolacci, som sendte ballen i det tomme nettet.

Noreg U21 er klar for den første semifinalen sin i EM sidan Nils Johan Semb tok laget til bronse i 1998. Sidan det ikkje blir spelt bronsekamp, er Noreg allereie sikra bronse.

Noreg speler semifinalen sin i Netanya laurdag. Nederland eller Spania blir motstandar. Laget som vinn gruppe B ventar for Noreg. Spania er favoritt mot Nederland og laget Noregs U21-gutar vil unngå. Spanjolane blir omtalte som det beste U21-laget i verda.

Østbø var Noreg beste tysdag, men tabben på overtid øydela for ein sensasjonell førsteplass i gruppe med Italia og England.