Bad om fridom for kristne fangar
Under Den nasjonale bønefrukosten mana Barack Obama til innsats for trusfridomen internasjonalt. På heimebane meiner kritikarar at presidenten reduserer den same fridomen.
Tradisjonen tru møtte presidenten torsdag opp på den årlege bønefrukosten i Washington D. C.
- All pris og ære til Gud som har bringa oss hit denne morgonen, sa Obama i innleiinga til talen sin.
Artikkelen fortsetter under annonsen.
Under tidlegare bønefrukostar har fortalt om korleis han kom til tru. Denne gongen beskreiv han i korte trekk kor mykje det betydde for han å verte teken hand om av kyrkja då han som ung var i ein vanskeleg situasjon.
- Det førte til at eg omfamna Jesus Kristus som min Herre og frelsar. Det førte meg til Michelle - mitt livs kjærleik - og velsigna oss med to ekstraordinære døtrer. Det førte meg til offentleg teneste. Og dess lenger eg gjer teneste, særleg i stunder med prøvingar eller tvil, dess meir takksam er eg for Guds leiande hand, sa Obama.
Uroleg for diskriminering
Hovudtemaet for talen var religionsfridom. Presidenten meiner denne ikkje berre er eit gode for den einskilde, men også for samfunnet.
- Fordi religion styrkjer Amerika, sa Obama.
Samtidig erkjente han at religionsfridomen er under press rundt i verda.
- Vi ser styresmakter står bak diskriminering og vald mot truande, sa han.
Dette meiner han strir med menneskeverdet og med grunnleggjande prinsipp i dei store religionane. Han viste til avsnitt i Bibelen, Toraen og Koranen for å underbyggje dette. På fleire måtar uttrykte han ei inkluderande haldning til tru og erfaring i andre religionar.
Artikkelen fortsetter under annonsen.
Vanskeleg tema
Ut frå historisk erfaring slo han fast at nasjonalar som sikrar dei grunnleggjande rettane til innbyggjarane, inkludert religionsfridomen, er meir rettferdige, fredelege og framgangsrike samfunn. Derfor kunngjorde han at eit av nøkkelmåla i amerikansk utanrikspolitikk er å fremje religionsfridom.
- Og eg er stolt av å seie at ingen nasjon i verda gjer meir for å forsvare religionsfridomen enn USA, sa han til applaus frå salen.
Sjølv om han medgav at det ikkje alltid er lett, understreka han at situasjonen for religiøse minoritetar ofte er tema når han snakkar med leiarar i andre land, som Kina og Burma.
Konkret tok han også opp situasjonen for to amerikanske statsborgarar som sit fengsla i andre land av religiøse årsaker: Kenneth Bae i Nord-Korea og pastor Saeed Abedini i Iran. Han lova at administrasjonen hans arbeider utan opphald for å få desse fri.
Krev unntak
Frå politiske motstandarar har Barack Obama fått skarp kritikk for å stramme inn religionsfridomen i USA. Fleire kristne organisasjonar har gått til rettsleg kamp mot pålegg i Obamas helsereform om å inkludere prevensjon i helseforsikring for tilsette, melder Religious News Service.
Målet er å få høgsterett til å erklære at slike pålegg er grunnlovsstridige. Ei gruppe på 38 kristne leiarar - blant dei USAs mest kjende pastor Rick Warren, den norskætta teologiprofessoren Wayne Grudem og apologeten Ravi Zacharias - har signert eit dokument til støtte for denne kampen.
Artikkelen fortsetter under annonsen.
Dei meiner kristen lære krev at trua styrer alle deler av livet. Derfor meiner dei det ikkje er forsvarleg å hjelpe andre med å utføre syndige aktivitetar. I dette tilfellet dreiar det seg om å betale for eller gjere tilgjengeleg prevensjon som kan forårsake abort.
Under fjorårets bønefrukost var den kjende afroamerikanske legen Ben Carson ein av talarane. Han nytta høvet til å gå til frontalåtak på Obamas helsereform.
Vil stå samla
Ein av dei mest Obama-kritiske politikarane i Kongressen, representant Louie Gohmert frå Texas, var blant innbydarane til årets bønefrukost. Han meiner arrangementet ikkje handlar om det som skaper skilje mellom amerikanarane.
- Det er tider då vi kan argumentere og diskutere dei viktige sakene og usemja om korleis vi skal oppnå det beste for Amerika, seier han til World Magazine. Men han avviser at Den nasjonale bønefrukosten er eit forum for dette. Då meiner han poenget er å stå samla på tvers av skiljelinjer. Dagen
Bønefrukost i Washington D. C.
Den første torsdagen i februar kvart år er det National Prayer Breakfast i Washington D. C.
Arrangementet vart skipa av den norske emigranten Abraham Vereide frå Gloppen i Nordfjord
Den første presidenten som deltok var Dwight D. Eisenhower i 1953. Alle amerikanske presidentar sidan del gongen har stilt på bønefrukosten
Heile talen til Obama kan lesast på nettsidene til Det kvite hus: whitehouse.gov