Velkommen, Valgerd

Velkommen heim frå ferie - og til å forklare folk eit par ting.

Kva skjer, Valgerd Svarstad Haugland? Eg pleidde å ha respekt for deg. Du verka reieleg og fornuftig. Du har gjort godt politisk arbeid. Stått i stormar og vore sakleg. I teneste for Kristeleg Folkeparti og seinare i arbeid for fylket eg kjem frå, Akershus. No nyleg blei du brått som ein liten unge. Bestemte deg med eitt for å seie opp både Vårt Land og Dagsavisen. Kvifor? Fordi “Dagsavisen støtta eit brev/opprop”?

Er dette åtferd du er komfortabel med, i din posisjon? Angrar du på delar av den?

I avisa Dagen stod dette å lese før påske:

«En av de som fredag valgte å si opp både Vårt Land og Dagsavisen, som også er eid av Mentor Medier, er Valgerd Svarstad Haugland, fylkesmann i Oslo og Akershus og tidligere KrF-leder.

«Eg har sagt opp både Vårt Land og Dagsavisen i dag. Dagsavisen støtta nemlig eit brev/opprop mot Åshild. Dette er tragisk!» skriver Svarstad Haugland i Gundersens Facebook-tråd.

Svarstad Haugland er for tiden på ferie i utlandet og ønsket ikke å la seg intervjue i denne saken.»

Det er greitt, det. Då kan du kanskje uttale deg no etter påske. Nokre spørsmål:

Synst du det er reieleg, ut frå den avgrensa(?) kunnskapen du har om konflikter i og rundt Vårt Land, å ta Åshild Mathisens parti (utan noko som helst atterhald)?

Kva trur du om det nokre tidlegare og noverande tilsette har fortalt (blant anna) Medier 24 - om Mathisens leiarstil og miljøpåverknad?

Er du av den oppfatninga at det er reieleg å kalle Dagsavisens/Lysholms val ”tragisk”, og å kunngjere offentleg at du seier opp Vårt Land og Dagsavisen?

Eg reknar med at du er både real, kristeleg og folkeleg nok til å svare. På førehand takk!