Vald strir mot bodskapen i Koranen

Svarinnlegg til Per-Arne Isaksen sitt innlegg «Toner ned forskjeller mellom islamske og vestlige verdier».

Det finst ulike oppfatningar av kva religion eigentleg er. Frå mitt perspektiv er det mest rettferdig å definere ein religion ut frå essensen i den, altså dei heilage tekstane, og ikkje ut frå korleis enkelte menneske praktiserer religionen. 

Praksis varierer mykje og er svært mangfaldig. Folk som tilhører ein og same religion, lever forskjellige liv og har ulike praksisar. Derfor kan ikkje alle desse livene og praksisane i seg sjølve definere religionen. Menneskelege handlingar blir heller ikkje berre påverka av religion, men også av kultur, historie, politikk, personlege erfaringar og ikkje minst av sjølve menneskets ego og begjær. Derfor meiner eg at vi først og fremst må sjå på dei heilage tekstane når vi skal seie kva ein religion inneber.