| Debatt
Vald i India kan ikkje fornektast, Gulati
Når dramatisk auka vald mot Indias religiøse mindretal blir fornekta av ein utanrikspolitisk talsmann på Stortinget, skal vi verkeleg bli urolege.
MINDRE DEMOKRATISK: Himanshu Gulati (th) brukar ordet «imponerande» om demokratiet i India, trass i at landet under regjeringa til statsminister Narendra Modi har sokke som ein stein på internasjonale demokrati-indeksar.
NTB
Stortingsrepresentant Himanshu Gulati frå Frp leverer i Morgenbladet (10. november) ei oppsiktsvekkjande lovprising av eit autoritært hindunasjonalistisk styre i India.
India er landet som foreldra til Gulati reiste frå for 50 år sidan. 37-åringen som no er blitt utanrikspolitisk talsmann for det største norske opposisjonspartiet, blei i 2019 sjølv æra av den indiske presidenten: Som ein person av indisk opphav fekk Gulati pris for framståande prestasjonar i den indiske diasporaen.
