| Leder
Uverdig kamp om 7. oktober-markeringa
Her i Noreg skal det vera rom for jødar og deira stemmer. Særleg på ein dag som dette.
ÅRSDAG: Statsminister Jonas Gahr Støre (Ap) og Israels ambassadør Avi Nir Feldklein i synagogen i Oslo ved ei markering av årsdagen for terrorangrepa i Israel 7. oktober 2023. Årets markering er prega av kamp om merksemda i hovudstaden.
Terje Pedersen / NTB
I helga skreiv Dagen om at det i Oslo går føre seg ein kamp om å få markera dagens dato, den 7. oktober. For jødiske aktørar er dagen ein dag for bearbeiding av eit traume.
«Den svarte sabbaten» for to år sidan representerer eit djupt sår i jødisk medvit. Denne dagen vart 1200 menneske drepne i verdas einaste jødiske stat. Det groteske og bestialske terrorangrepet har blitt grundig dokumentert. Alle som vart råka, har rett å få minnast dagen slik dei har behov for.
Framleis finst gislar som denne dagen vart rivne ut av kvardagen og degraderte til brikker i eit grufullt spel der det berre synest vera taparar.
