Ta vare på hjartet framfor alt
Fridagane i påska er ein gyllen sjanse til å ta vare på hjarta. Lat oss gripe denne sjansen. Lat oss leve med i påskedramaet og be Jesus vise på nytt kva han gjorde for oss på korset, skriv Dagen på lederplass.
Bruk kart og kompass, seier fjellvettregel nummer 6. Kart er flott. Kompass er verre, sjølv om friluftsglade folk bør meistre begge deler no som påskeferien står for døra.
Sjølv har eg eit anstrengt forhold til kompass. Det har eg hatt heilt sidan vi skulle lære orientering på barneskulen og eg virra retningsvill rundt mellom myrar og einebusker i Markane, vest for Stryn.
Artikkelen fortsetter under annonsen.
Men no har eg funne eit kompass som fungerer. Eit kompass som blant anna er ypperleg for journalistar. Eg fann det i Salomos ordtak, kapittel 4, vers 23, og det lyder slik:
Ta vare på hjartet framfor alt, for livet går ut frå det.
Så enkelt, og så vanskeleg.
Desse orda slår fast kva som er det eine viktige: Å ta vare på hjartet, framfor alt anna vi held på med. Steller vi ille med hjartet, må kursen justerast.
For eit par år sidan hadde eg ein samtale med ein utanlandsk kollega. Etter eit langt liv i kristen presse i heimlandet hadde det slått han at det var lett å bli kynisk. Erkjenninga vart ei vekkjing for han, og han innsåg at han måtte ta grep i livet for å ta vare på hjartet sitt.
Som journalistar i kristen presse opplever vi mykje fantastisk, men også ein del krevjande. Vi dekkjer konfliktar og utfordrande teologiske debattar, som nokre gonger kan gå på trua laus. Vi skriv om underslag, utruskap, overgrep, grådigheit og av og til dumskap. Vi har opplevd folk bli sinte, urimelege og fornærma. Og vi har møtt mange med oppblåste ego. Som journalist kan ein bli desillusjonert, og etter kvart kynisk.
Eller kanskje har vi dekt så mykje naud og kriser, at den menneskelege lidinga ikkje går inn på oss lenger.
Det er dessutan fort gjort at vi som har som heildagsjobb å vere kritiske, også blir forferdeleg kritiske når vi høyrer kristen forkynning. At vi heile tida vurderer, i staden for å ta til oss bodskapen. Det er ein fare for at hjartet blir hardt. At vi blir observatørar istaden for deltakarar.
Artikkelen fortsetter under annonsen.
Det er skilnad på å drive kritisk journalistikk og å vere ein kynisk journalist. Kritisk journalistikk jaktar på sanninga. Den kritiske journalistikken er ein berebjelke i demokratiet. Kynisme, derimot, let seg ikkje kombinere med god journalistikk. Kynismen er hard, kald og omsynslaus.
For å vere tru mot den visjonen som dreiv dei fleste av oss inn i journalistikken, nemleg ønsket om å søkje sanninga, stå opp mot urettferd og vere ei byggjande kraft, er det avgjernade at journalistar følgjer Ordspråka 4,23 og tek vare på hjartet sitt.
Den same oppfordringa kan rettast mot kristne i alle andre yrke og livssituasjonar. Ordspråka 4,23 er eit kompass for oss alle.
Å ta vare på hjartet, handlar om å leve nær Jesus og ta til oss det vi treng av åndeleg næring. Slik det står i eit anna bibelsk kompass, i Matt 6,33: Søk først Guds rike og hans rettferd, så skal de få alt det andre i tillegg.
Gud først. Resten etterpå.
Det er nok av krefter som dreg oss ut av kurs og vekk frå Jesus. Blant anna misunning, baktaling, hovmod, manglande vilje til å tilgi, materialisme - eller som det står i Bibelselskapets siste, augeopnande omsetjing av Kol 3,5: «trongen til alltid å eige meir, som ikkje er anna enn avgudsdyrking.»
Jaget etter den perfekte kroppen, den perfekte heimen, den perfekte ferien og andre statusmarkørar fører oss rett over i ei anna forvillande kraft, nemleg at vi gjer oss sjølve så forferdeleg travle. Aftenposten skreiv denne veka om kvinner med trippelbyrde. Dei skal ikkje berre yte maksimalt heime og på jobb, men også når det gjeld trening, sosial omgang og sjølvrealisering. Mange tøyer strikken så langt at han ryk.
Fridagane i påska er ein gyllen sjanse til å ta vare på hjarta. Lat oss gripe denne sjansen. Lat oss leve med i påskedramaet og be Jesus vise på nytt kva han gjorde for oss på korset.
Artikkelen fortsetter under annonsen.
Vi treng å bevare hjartet for at vi sjølve skal bli bevarte. Bøna i Salme 139, 23 er ei hjelp til å kome tilbake på den gode kursen:
Ransak meg, Gud, og kjenn mitt hjarte,
prøv meg og kjenn mine tankar!
Sjå om eg følgjer avgudsveg,
og lei meg på den evige vegen!
Velsigna påske.