Snakk om vekkingsmøte er ei avsporing av gravferdsdebatten

Det er med stort ubehag eg held fram med å kommentera Preses sin opptreden i kongens gravferd. Teamet gjeld Den norske kyrkja sin gjeldande gravferdsliturgi og forkynning i denne samanhengen. Vi bør helst drøfta det uavhengig av ei konkret gravferd.

Må tilstå at baptistleiaren sin kommentar - om falsk forventning om vekkingsmøte -  er ei klar avsporing frå det både eg og andre har påpeikt. For min del var det Preses si forklaring etterpå om faren for missforståing av Joh. 3,16 og total mangel av det obligatoriske med skriftlesinga i Den norske kyrkja sin gravferdsliturgi som eg har påpeikt utan å sjå at Preses har grunngjeve dette. 

Så har eg støtta prof. Oftestad si påpeiking om manglande trusperspektiv i talen. Å snakka om å forventa vekkingsmøte i denne samanhengen er langt frå det saka dreier seg om. Vi som kan leia ei gravferd i Den norske kyrkja, må vera opptekne av å visa både omsorg, forståing, gje trøyst og å vera lojale mot den ordning som gjeld.