Sæbjørnsen-debatt: Stephens kulturanalyse står til stryk

Daniel Sæbjørnsen er ute med ny bok. Når ein profilert konservativ pastor skriv om «Kjærlighet, kjønn og kids» er det lite overraskande at debatt følgjer i kjølvatnet. 

Håpet er likevel alltid at slike debattar skal vera rimelege og førast på eit sakleg nivå. Særleg bør ein ha forventingar til at bidrag frå akademikarar skal vera med på å tilføra den kunnskapen som ofte manglar i overoppheta kommentarfelt. Og særleg trengst dette når tematikkane dreier inn på kjønn og familie. 

Slike tema, kvardagslege som dei er, har blitt brennbare i vår tid. Sæbjørnsen vel i si siste bok å utforska desse med utgangspunkt i eit kristent livssyn og med ei haldning til sanning som skil seg skarpt frå ei individualistisk og relativistisk samtid. Vi kan gjerne seia at Åsane-pastoren ber om bråk.