| I fokus
Politikaren som endra kurs
VEGEN TIL ENDRING: Julius Nyerere (bilete frå 1997) vart til slutt fredsmeklar på det afrikanske kontinent – ein som forstod seg på menneskehjarta, og vegen til endring. Det som ifølgje han sjølv, «berre skjer gjennom evangeliet, og vennskapet med Jesus Kristus – Fredsfyrsten», skriv Jan Helge Aarseth.
Sayyid Azim / AP / NTB
Me stod oppstilte og venta i spaning på han som var æresgjesten på opninga av det nye bispedømet i Mara i Tanzania, då ein enkel og alminneleg mann runda hjørnet kledd ein blågrå dress med open krage. Ein heller liten og sped mann, med kvitt krølla hår og ein kjenneleg mustasje.
Eit fast handtrykk, eit hjarteleg og venleg smil, og nokre korte oppmuntrande ord til desse unge og litt forkomne frå Norden. «Karibuni marafiki» – velkomne venner!
Mannen var Julius Nyerere, «Baba wa taifa» i Tanzania – «landsfaderen» og «Mwalimu» – læraren. Første president etter tiår med ulike europeiske kolonimakter. Ein politikar og leiar kjenneteikna av stor idealisme og ein brennande sosialisme. Denne siste forma i eiga drakt basert på kooperativ og fellesskapsbaserte landsbyprosjekt, der folk vart flytta med hard hand for å gi alle tilgang på skule og helsehjelp. Dette var Ujamaa – «fellesskap» og «brorskap», der nasjonal og lokal sjølvforsyning, sosial likskap i alle ledd og avskaffing av privat eigarskap var fanesaker.
