Norske våpen til Israel
I staden for å innrette salet av våpen eller boikott etter krigsprinsippet, burde politikken fremjast i høve til demokratiprinsippet.
Me likte godt dei signala som kom frå leiaren i Israels Venner i Stortinget denne veka: Jørund Rytman (Frp) meiner det er på høg tid å avslutte boikotten av norsk våpensal til Israel.
Ein av Høgres statssekretærar i UD, Bård Glad Pedersen, gjer i Dagen i dag sitt beste for å skyte ned utspelet frå sin eigen regjeringspartnar.
Artikkelen fortsetter under annonsen.
Men siste ordet er ikkje sagt i denne saka. Me meiner at støttepartiet Kristeleg Folkeparti bør tone flagg. Ein kan ikkje overlate til Frp å fronte dette viktige prinsippspørsmålet åleine.
Det norske regelverket for våpensal til Israel er moge for revisjon. I dag kan Noreg importere våpen og våpenutstyr frå Israel, men handelen kan ikkje gå den andre vegen. Også våpenkjøpet er regulert. Blant anna kan ikkje verdien av einskilde innkjøp stige over ein viss sum utan å utløyse avtalar om gjenkjøp.
I dag er hovudregelen at Noreg ikkje vil tillate sal av våpen- og utstyr til område der det er krig eller trugsmål om krig. Teoretisk høyrest det greitt ut, men røyndomen i verda er annleis.
Vår fremste allierte, USA, er jo eit land som er krig; rett nok ikkje mot andre nasjonar, men mot den internasjonale islamistiske terroren som trugar interesser i heile den vestlege og demokratiske verda.
I dag operer USA militært i ei rekkje land, som Afghanistan, Pakistan og andre stader. Like fullt har me eit nært samarbeid med USA. Sjølvsagt.
Me eksporterer jamvel våpen til andre nasjonar som råkar ut i konfliktsituasjonar. Det gjeld til dømes Tyrkia, som i lange tider har hatt ein blodig strid med den kurdiske motstandsrørsla PKK.
I staden for å innrette salet av våpen eller boikott etter krigsprinsippet, burde politikken fremjast i høve til demokratiprinsippet.
Då må Israel, utan atterhald, reknast med. Israel står som eit einsleg demokrati midt inne i eit hav av despotiske regime. I den harde striden for å kunne overleva i dette grannelaget treng Israel all den tilgangen til forsvarsvåpen som landet kan få. Israel står i fremste line for å kjempe mot den aggressive islamistiske trusselen, og som våre vener bør me ikkje gjera kampen deira vanskelegare enn naudsynt.
Artikkelen fortsetter under annonsen.
Ikkje overraskande er det Eskil Pedersen i AUF som går hardast ut mot utspelet om å opne for våpensal til Israel, slik Rytman har skissert. Han må gjerne argumentere kvifor han meiner det er rett å nekte Israel norske våpen.
Men me kan ikkje motstå freistinga til å minne Pedersen om at han tilhøyrer det partiet som - historisk sett - har gjeve det sterkaste bidraget til Israels militære slagkraft. Det gjeld salet av norsk tungtvatn til Israel på slutten av 1950-åra, som leiande krinsar i Arbeiderpartiet var klar over at Israel ville nytte til utvikling av eigne atomvåpen. Likevel sa ein ja til eit slikt sal. Samanlikna med slik slagkraft vert ammunisjonen frå Raufoss som lite å rekne.