Nok sløsing: Kyrkjevalet må tilbake til kyrkja

Stemmene frå kyrkjevalet er endeleg talde opp, og fasit er klar. Valdeltakinga landa på rundt ni prosent. Berre vel 270 000 av dei over tre millionar medlemmene i Dnk fann vegen til eit vallokale for å seia si meining om kven som skal styra folkekyrkja framover.

Som fleire erfarne kyrkjefolk har påpeika: ei oppslutning på rundt ni prosent er ikkje så aller verst for ein medlemsorganisasjon. Men der andre organisasjonar satsar på wienerbrød og twist for å få opp engasjementet, har Den norske kyrkja bladd opp mange titals millionar for å nå ut til sine veljarar.

Det er umogleg å sjå valdeltakinga lausrive frå den massive pengebruken som både har knytt seg til fysisk val og også til ei storstilt satsing på digitalisering av valet.