Misjonsteologi til inspirasjon og lærdom

For å seia det med det same: Denne boka skulle ha vore meld for lenge sidan, men av ulike grunnar har det ikkje vorte før no. Boka er så viktig, at ho bør løftast fram, sjølv om det er i seinaste laget. 

Det er ei lærebok i misjonsteologi, og ho kan seiast å vera Arne Redse sitt testamente til det norske kristenfolket. Han signerte føreordet i november 2023, berre dagar før han døydde. Redse var ein uvanleg breitt orientert teolog, og han var professor i misjonsteologi på Fjellhaug Internasjonale Høgskole.

Boka har stor breidde i framstillinga av misjonsteologien. Det er naturleg å byrja med å presentera sjølve fagområdet. Etter det er det mykje som går på misjon ut frå Bibelen, og dei ulike sider ved misjonsarbeidet i lys av Guds ord.