Misjon, tru og politikk

Alle menneske er fødde misjonærar! Det er vi heilt enkelt fordi vi alle er skapte i Guds bilete og har del i «Missio Dei» – Guds misjon. Vi har ein innebygd trong til å skapa og påverka, med utgangspunkt i den vi er. Alt det skapte seier noko om Skaparen. Skaparverket viser oss Guds usynlege vesen, hans evige kraft og guddom. 

Menneskeleg kunst og kultur seier noko om dei menneska som står bak. Det vi seier og gjer viser kven vi er. Det er heilt menneskeleg å villa gje livet og trua vidare til nye generasjonar. Vi er alle misjonærar, skapte i Guds bilete.

Ateistar misjonærar for ateisme. Humanetikarar misjonærar for sitt livssyn. Politikarane misjonærar for dei politiske ideologiane til partiet sitt. Slik misjonærar også dei fleste religionar for si tru. Ingen er nøytrale. Alle har eit livssyn som vi ber med oss og fargar det vi seier og gjer.