Kyrkjemøtet - Skrifta og oppfatningar i tida
Kyrkja står ved sine organ i eit tilslutningsforhold til Skrifta, ikkje i eit dommarforhold, skriv Johannes Kleppa.
Kyrkjemøtet (KM) som byrjar i dag, er ei underleg forsamling. Eg har fleire gonger sete på pressebenken under Kyrkjemøtet (KM), og det er ei ambivalent oppleving.
KM er Den norske kyrkja (Dnk) sitt administrativt øvste organ med Kyrkjerådet som utøvande organ.
Artikkelen fortsetter under annonsen.
Til forskjell frå staten si tredeling av makta har Dnk ikkje nokon domstol. Med det får KM også denne funksjonen, slik at dette kyrkjedemokratiske rådet kan døma om kva som er rett lære, og kva konsekvensar denne skal ha innan kyrkjesamfunnet.
Bispemøtet har eit særskild læreansvar, men då slik at biskopane gjev innstilling til KM. Når så biskopane er usamde i lærespørsmål, vert det KM som må skjæra gjennom den teologiske usemja og gjera bindande læremessig fleirtalsvedtak.
No er det slik at kyrkja, etter luthersk lære, heller ikkje skal ha nokon domstol, fordi Skrifta er den øvste dommaren i lærespørsmål.
Kyrkja skal spørja etter kva Skrifta seier, og så innretta seg etter det, i forkynning, i undervisning og i praktiske og liturgiske forhold.
Kyrkja står ved sine organ i eit tilslutningsforhold til Skrifta, ikkje i eit dommarforhold. Det vert då det stadige arbeidet med Skrifta som avgjer kva som er rett lære.
Dette arbeidet har ei totusenårig historie. Der det oppstår usemje om lærespørsmål, vil det vera det åndelege leiarskapet som er basert på Guds kall, nådegåver og åndsutrustning som skal rettleia i det, og som ut frå nøklemakta skal binda den falske læra og setja fri ved den sanne læra. Det stor problemet er at Ordets domstol er forlaten, og erstatta av tida.
Det som framfor årets KM har vore den store spenningssaka, er spørsmålet om Dnk skal laga ein «vigselordning» som omfattar likekjønna par, eller ikkje.
Dei siste dagane har det dukka opp ei ny sak som gjeld forholdet til menneskerettane, og som med det omfattar livsretten og spørsmålet om abort.
Artikkelen fortsetter under annonsen.
Begge desse spørsmåla står i eit forhold til Guds ord og til gjeldande lovgjeving i samfunnet, nasjonalt og internasjonalt. Det dreier seg om dei etisk sett to mest fundamentale spørsmåla for kyrkje og samfunn, tett etterfylgt av spørsmål knytt til miljø og forbruk.
Både abortspørsmålet og ekteskapsspørsmålet skulle vera innlysande klare ut frå Skrifta og kyrkja si samla forståing av desse gjennom to tusen år.
Det burde vore ei enkel sak å slutta seg til kyrkjeleg lære på desse området, men slik er det som kjent ikkje. Biskopane lærer vrangt i ekteskapsspørsmålet, og no har det kome eit dokument frå Mellomkyrkjeleg Råd (MR) som i det minste må seiast å villeia i abortspørsmålet.
Det har lenge vore ein kamp internasjonalt, særleg i FN-systemet, for å fremja fri abort. Dette har ofte skjedd under dekkordet «reproduktive rettar». Dette har særleg møtt motstand frå katolsk dominerte land, men no vil MR at Dnk skal stilla seg inn under den «reproduktive» fana.