Faste og politikk?

«Når eg deler ut brød, kallar dei meg ein helgen. Men då eg spør kvifor dei ikkje har brød, kallar dei meg kommunist!» Dette gamle sitatet frå den brasilianske erkebiskopen Dom Hélder Câmara er verd å ta fram i fastetida. Gjerne saman med «kjerneteksten» frå Jesaja 58, om den rette fasta; ein tekst som luktar sveitte og handling, meir enn fromme bøner i eit støvete lønkammer. 

Handlar faste òg om politikk?

Skal vi løysa urettferdige lenkjer, dela vårt brød, sleppa undertrykte fri og gjera meir enn fromme ønskje eller bøner, trengst det djerv diakoni. Ein diakoni som krev rettferd og spør: Kvifor har dei ikkje brød? Og kva kan vi gjera med det? Faste som ikkje set spor i handling, mistar krafta si. Men krafta hentar me i bøn til han som kom for vår frigjering. Bøn og handling må vera eitt.