Det gjeld å bli kvitt gjeld
- Kunsten er å vite kor mykje gjeld vi toler. Kreditorar som raust deler ut pengar, vil nådelaust krevje dei tilbake - med renter, skriv Tore Hjalmar Sævik.
Dei fleste av oss lever med lån. Utan ei eller anna form for kreditt er det vanlegvis vanskeleg å skaffe seg hus, bil og utdanning. Ein kan verte så forsiktig med gjeld at ein råkar seg sjølv og sine. Men faren er nok større for det motsette: å verte for uforsiktig.
Kunsten er å vite kor mykje gjeld vi toler. Kreditorar som raust deler ut pengar, vil nådelaust krevje dei tilbake - med renter. For tida er ikkje rentene så mykje å snakke om, samanlikna med det dei tidvis har vore tidlegare. Men det kan jo endre seg.
Artikkelen fortsetter under annonsen.
Ein brite eg snakka med, oppsummerte det enkelt og greitt: Gjeldsproblem kjem av at vi kjøper ting vi ikkje treng for pengar vi ikkje har for å imponere folk vi ikkje likar.
Sjølv bur han i eit land som slit med ei svimlande statsgjeld og strevar med å få skikkeleg fart på økonomien etter finanskrisa.
I USA er situasjonen ikkje betre. Fordeler ein den statlege gjelda på dei drygt 317 millionane som bur i landet, utgjer ho over 300.000 kroner pr. person. På nettstaden usdebtclock.org kan ein sjå korleis gjelda veks for kvart sekund, i eit forrykande tempo.
Det er ikkje rart at offentlege budsjett skaper stort engasjement i «The land of plenty». Ein treng ikkje rare økonomiske kompetansen for å forstå at noko har gått alvorleg gale og må rettast opp. Spørsmålet er korleis. Svara spriker, for å seie det mildt.
Er det umoralsk å ha ei så stor gjeld? Magasinet Christianity Today har utfordra tre kristne tenkjarar til å drøfte spørsmålet. Dei vurderer situasjonen forskjellig. Ein av dei meiner det største problemet i USA er den store økonomiske ulikskapen mellom innbyggjarane, og hevdar landet kan takle endå meir gjeld enn det allereie har opparbeidd seg.
Dei to andre meiner kredittsituasjonen vitnar om ein livsstil som dreiar seg om å leve på forskot - og som kan ende i både økonomisk og åndeleg ruin. Derfor tek dei til orde for smertefulle kutt.
Eit av dei store problema med ein ukritisk kultur for å ta opp lån, er at han har ein tendens til å skli stadig meir ut. Det ser vi teikn til også i Noreg. «Ungdom mellom 19 og 26 år skylder til sammen over én milliard i inkassogjeld», melde NA24.no i sommar. «Norske unge er kjappere ute med kredittkort enn i våre naboland», skreiv Dine Penger i haust.
Det er fort gjort å skulde unge for manglande ansvar og kortsiktig økonomisk tenking. Men det er nok dessverre også litt for lettvint. Når såvel vaksne einskildpersonar som verksemder og statar lever høgt på lånte ressursar, er det ikkje rart om unge menneske vel å gjere det same. I Noreg har vi så store oljeinntekter at vi knapt merkar at vi forbrukar meir enn vi produserer.
Artikkelen fortsetter under annonsen.
Slik kan vi neppe halde fram på sikt. Om vi brukar det vi ikkje har, vil vi ein dag ikkje ha det vi vil bruke. Så enkelt er det - og så vanskeleg.
DAGEN
Tore Hjalmar Sævik
journalist i Dagen