Pinsekarismatisk om Anden

Boka «Den Hellige Ånd i vår tid» er ei god og grundig framstilling av forståinga av Den Heilage Ande i pinserørsla og i prinsekarismatiske samanhengar generelt, både med tanke på lære og erfaring. Boka inneheld bibelsk stoff om Anden, Andens gjerning og Andens gåver.

Det er også ein kortfatta, men interessant og opplysande, historisk gjennomgang av lære og erfaring av Anden i pinserørsla og i karismatiske samanhengar fram til vår tid, der den i hovudsak lutherske Oase-rørsla også er inkludert. Det er til sist nokre kapittel som set søkjelys på trongen for Anden i vår tid. I tillegg er det referert nokre personlege erfaringar av Anden, særleg frå Aril Edvardsen.

Det heile er greitt og tydeleg framstilt, og det er slik at dei to forfattarane skriv alt i lag, bortsett frå litt som går på deira personlege erfaringa. Boka er altså prega av og formidlar vidare pinserørsla si lære om Anden, særleg med tanke på åndsdåp med tungetale som teikn. Det som gjeld nådegåvene, er i hovudsak i samsvar med nyare karismatisk oppfatning.