DIKTAR: For 75 år sidan debuterte Olav H. Hauge (1908-1994) med diktsamlinga «Glør i oska»
Frå boka «Mitt Liv Var Draum» / NPK
Olav H. Hauge debuterte for 75 år sidan. Eitt av dikta frå samlinga har blitt ein salme
For Hauge fall religion saman med det visjonære, seier professor Jan Inge Sørbø.
For 75 år sidan debuterte eplebonden frå Ulvik i Hardanger med diktsamlinga Glør i oska. Diktsamlinga var starten på ein forfattarskap som har vore til både glede og trøyst for mange.
Men diktaren sjølv var klar for å gje opp skrivinga etter at diktsamlinga vart publisert. 20. desember 1946 skriv han i dagboka si «eg tenkjer det er både fyrste og siste gongen eg gjev ut nokor bok».
Diktaren kom på betre tankar, og no er han omsett til over tjue språk.
