Jødehat – ei plage me ikkje blir kvitt

Ein skulle kanskje tru og håpa at ei bok om dette emnet måtte vera tynn og med få sider. For antisemittismen forsvann vel stort sett etter Holocaust, både i Noreg og Europa elles, og den heile verda!? Ja, gid det var så vel. Ikkje at eg fekk ei tynn bok i hendene! Men at antisemittismen forsvann. Forlaget grip også fatt i denne tanken på baksida av boka, og peikar på at så ikkje skjedde. Dette fenomenet har overlevd først og fremst i ekstreme miljø, og eit godt stykke på veg også hjå folk flest.

Nyare undersøkingar frå HL-senteret syner oss også dette. Slik sett er det ikkje overraskande at me får ei rimeleg tjukk bok i hendene. Det vil seia – ho kunne nok vore mykje tjukkare, om alt skulle vore tatt med. Og endå snakkar me berre om Noreg!

Forfattaren (fødd 1981) har doktorgrad i historie, og arbeider for tida som forskar ved Jødisk Museum i Oslo. Spesialfelta hans er nettopp antisemittisme-, nasjonalsosialisme- og okkupasjonshistorie. I 2021 mottok Kjetil Braut Simonsen Sverre Steen-prisen for framifrå formidling av historie på høgt fagleg nivå.