Anmeldelser
KINA: Karl Ludvig Reichelt reiste til Kina i 1903 som utsending for NMS, skriv Johannes Kleppa.
Adobe Stock Photo
Fascinerande om anerkjent og omstridt misjonær
Notto R. Thelle har gitt oss ei omfangsrik og godt dokumentert bok. Ho er så tjukk at det tok ei stund før eg gjekk laus på henne, men eg har lese bok med stort utbytte og fascinasjon.
Karl Ludvig Reichelt (1877–1952) er ein av dei mest profilerte og internasjonalt kjente misjonærane Noreg har fostra. Han var både anerkjent og kontroversiell. Han var misjonær i Austen, særleg i Kina og Hongkong. Han reiste ut for Det Norske Misjonsselskap (NMS), men starta etter ei tid Den nordisk kristne buddhistmisjon (no: Areopagos). Misjonstenesta hans var svært omfattande og på mange måtar særmerkt.
No har Reichelt fått sin velfortente biografi, skriven av professor Notto R. Thelle. Det finst knapt nokon som kjenner livet og tenesta til Reichelt betre enn han. Hans far, Notto Normann Thelle, var gjennom store delar av livet Reichelt sin næraste medarbeidar. Dessutan er Thelle ekspert på Austen og buddhismen, og har gjennom eit langt professorliv levd nært det misjonsarbeidet Reichelt starta.
Han kjenner altså historia frå innsida. Dette har den utfordringa med seg at det kan verta for lite distanse og for lite kritisk analyse. Stort sett synest eg professoren kjem godt frå det, men til tider skin det tydeleg gjennom at Thelle står Reichelt nær og i hovudsak deler religions- og misjonssynet hans. Framstillinga vert difor nokre gonger litt mykje apologetisk i forhold til den kritikken Reichelt møtte.
