Andaktar for folk i farten

Håkon C. Hartvedt har skrive eit utal korte andaktar opp gjennom åra. Ein god del av desse har vorte til andaktsbøker, og no har det kome enda ei ny andaktsbok frå pennen hans.

Noko av det som pregar Hartvedt sine andaktar, er at han brukar ei forteljing eller eit sitat til å få fram eit poeng som han så knyter eit bibelord eller ein bibelsk tanke til. Dette er heilt gjennomført i denne boka.

Det som også pregar boka, er at andaktane er ekstremt korte. Det er nesten som at boka fell utafor kategorien for ei vanleg andaktsbok, både ut frå opplegget og måte andaktane er skrivne på. Det er ikkje ei utlegging av ein bibelsk tekst, men det er bibelske tankar knytt til ei kort forteljing eller eit sitat.