DEBUTANT: Lyrikkdebutant Marcus Sele Samuelsberg (30) frå Klepp i Rogaland.
Alice Tegle
Marcus (30) om sjukdomen: – Det var ein reell fare for at eg kunne døy
Då Marcus vart alvorleg sjuk jula 2021, trudde han at han var komen til livs ende. I staden hjelpte sjukdomen han med å realisera ein litterær draum.
Marcus Sele Samuelsberg er 30 år og kjem frå Klepp i Rogaland. Han er utdanna lektor, jobbar som norsklærar for minoritetsspråklege ved Bryne vidaregåande skule og elskar å skriva.
For fyrste gong er han ute med ei diktsamling som han har sysla med dei siste tre åra, men bakgrunnen for det litterære verket viser seg å vera turbulent.
Jula 2021 sette livet han på prøve. Han kjende seg både einsam og isolert frå før av, men ein livstrugande koronainfeksjon gjorde tilstanden desto verre, og den dåverande 26-åringen vart alvorleg sjuk.
