Politikk

I tider før eit val er det ofte mykje politikk i media, og somme nyttar sterke ord.

Gamle sitat vert henta fram og nytta for alt det er verd – og vel så det. Det er ikkje sikkert at alle tenkjer over det, men det kan gå på sanninga laus. Og då blir mykje skeivt.

Ei anna side ved denne val-tida er dei mange partia. Store og mellomstore parti har sine program og går til val på dei. Slike program famnar ofte vidt og breitt. Og det må dei gjera om dei skal styra landet. For der er mange fasettar.

Men så kjem me til dei små partia. Dei gror opp i fleirtal nå. Eg har sjølv vore spurt om eg ville stilla på eit par slike små partilister for år tilbake. Men eg takka nei. Ei anna sak her er at slike parti lett kan koma «på vippen». Er det greitt? Små parti har ofte ei eller nokre få kjernesaker som dei kjempar for. I valkampen nå ser me at nokre jublar høgt fordi dei kan koma på vippen og få sine saker fram. Dei skal på ein måte overstyra heile landet.

Er det demokrati? Ordet tyder folkestyre. Ei vanleg tyding er at fleirtalet får rett og makt til å leia og styra landet. Men viss ein eller to personar t.d. kan stansa eller så å seias tvinga ei sak gjennom, er det folkestyre?

Slik det politiske systemet er i dag, blir dette vanskeleg. Politikarane må vera trollmenn for å få saker igjennom. Korleis vil det gå dette året?