Kristne vekeaviser opp, kristne dagsaviser ned
Opplaget til Korsets Seier og Norge Idag gjekk fram i fjor. Dagen og Vårt Land gjekk tilbake. Dagen-direktør Christer Skoge lovar offensiv satsing på sal.
Tendensen i mediemarknaden er at digitale plattformer veks medan papirutgåver går tilbake. Tala som vart lagde fram av Mediebedriftenes landsforbund i går, viser at nettutgåvene veks med 5,5 prosent, medan det totale opplaget til norske dagsaviser går ned med 4,4 prosent.
Framleis les 69 prosent av det norske folk ei dagsavis på papir ein vanleg vekedag.
Artikkelen fortsetter under annonsen.
Fleire på nett
Medan typiske laussalsaviser som VG og Dagbladet opplever størst tilbakegang, går dei såkalla nisjeavisene totalt sett litt fram. Klassekampen er likevel den einaste av dagsavisene i denne kategorien som aukar opplaget (sjå faktaboks).
Dagen fekk i fjor eit godkjent opplag på 10.352, som er ein tilbakegang på 473. Det gir avisa eit dagleg lesartal på 23.000, mot 24.000 året før.
- Vi følgjer trenden i marknaden, seier administrerande direktør Christer Skoge.
Samstundes påpeikar han at besøket på nettsidene har auka kraftig i året som gjekk, frå 7.000 til 12.000 daglege brukarar.
- Det gjer at vi totalt sett når fleire, seier han.
Spent på rammevilkår
Veksten på nett har gitt betre sal av annonsar på denne plattforma, men Skoge påpeikar at det framleis er ein veg å gå før det er mogeleg å få slik satsing til å bere seg økonomisk.
Artikkelen fortsetter under annonsen.
- Vi ser på ulike løysingar. Det er viktig å lære av andre i marknaden som både har feila og lykkast med sine nettsatsingar, seier han.
Papirutgåva vil framleis vere berebjelken, men direktøren er spent på kva rammevilkår politikarene vil gi avisene framover. I alle fall er målet å auke abonnementstalet.
- Med hardt arbeid trur vi det er mogeleg. Vi har nettopp utvida salsapparatet og oppretta nytt kontor på Hamar. Trenden så langt i år er langt betre enn på same tid i fjor, seier Skoge.
Redaktør Kari Fure understrekar at tilbakegangen er alvorleg, men meiner han er mindre enn ein hadde grunn til å frykte.
- Vi trur det er mogeleg å snu utviklinga. Tala på nett viser at vi har fått utteljing for satsinga vi har gjort der. Vi gler oss over mange positive tilbakemeldingar på avisa. Kombinert med ei offensiv markandssatsing trur vi det skal føre til at fleire får augo opp for Dagen, seier Fure.
Den andre kristne dagsavisa, Vårt Land, har eit godkjent opplag på 23.682, som er 789 mindre enn året før. Sjefredaktør Helge Simonnes skriv i ein nettleiar at tilbakegangen for tabloidavisene ikkje betyr at avisbransjen ligg på sotteseng. Han meiner mykje tyder på at publikum vil ha papiraviser som tilbyr djupnestoff innanfor bestemte nisjer.
«Det disse avisene ikke trenger, er utålmodige politikere som trekker lettvinte og gale konkusjoner ut fra det som skjer med tabloidavisene», skriv Simonnes.
Dei kristne vekeavisene fekk ein opptur i fjor. Norge Idag enda på 11.202, ein oppgang på 150.
Artikkelen fortsetter under annonsen.
- Når avismarknaden er prega av sterk tilbakegang, så er vi veldig lykkelege over at vi held skansen og går langsomt framover, seier redaktør Bjarte Ystebø.
- Vi har veldig trufaste lesarar og ei positiv stemning rundt avisa, legg han til.
Vekeavisa til Pinserørsla, Korsets Seier, går for et opplagsløft på 1.000 i løpet av det inneverande året, som Dagen fortalte om i går. Tala for fjoråret er i så måte oppmuntrande.
Etter fleire år med betydeleg tilbakegang fekk Korsets Seier ein godkjend framgang på 229 og har dermed eit opplag på 5.041.
Opplagstal for nisjeaviser
Vårt Land: 23.682 (-789)
Dagsavisen: 23.056 (-238)
Klassekampen: 17.648 (+1.295)
Nationen: 11.794 (-391)
Dagen: 10.352 (-473)
Morgenbladet: 29.337 (+732)
Dag og Tid: 9.582 (+450)
Korsets Seier: 5.041 (+229)
Norge Idag: 11.202 (+150)