Det arabiske dobbeltspråket
Palestinaarabarane godkjenner ikkje Israel som jødisk stat, skriver Karl Johan Halaråker i denne kronikken.
På den eine sida står dei palestinaarabiske leiarane fram med storsinn og godkjenning av Israel som stat. Men snart syner det seg at aksept av Israel som jødisk stat, kjem ikkje på tale.
Vi har sett det i uttalar både frå den palestinaarbiske leiaren Mahmoud Abbas og Den arabiske Liga. Om enn ulik retorikk er det inga skilnad mellom Fatah-rørsla på Vestbredda og Hamas i Gaza. I konkrete ordlag tyder det at ein ikkje har komme ein tøddel vidare i forhandlingane.
Artikkelen fortsetter under annonsen.
Lite tyder på at president Obama og hans ivrige utanriksminister Kerry går inn i historia på anna måte enn sine forgjengarar når det gjeld Israel og Midtausten. Hektisk aktivitet i slutten av presidentperioden - null i resultat.
Ein kan gjerne tala om at Israel er sterk og steil. Israel bryt folkeretten, Israel audmjukar palestinaarabarane både med busetnader og alle restriksjonar og hindringar i det daglege livet. Ja, det er mange nyansar i det komplekse biletet.
Men skjer vi gjennom talemåtane, er det to palestinaarabiske krav som er dei store hindringane for fredsprosessen: Palestinaarabarane godkjenner ikkje Israel som jødisk stat. Palestinaarabarane krev tilbakevending til Israel for alle etterkomarar av flyktningar frå opprettinga av staten Israel.
Dersom det skal bli framgang i fredsforhandlingane, må desse krava bort. Spørsmålet om flyktningane er ei symbolsak palestinaarabarane held oppe. Det hjelper på mediestrategien som martyrar og underkua folk under ei sterk militærmakt. Reelt sett veit alle at dette er eit umogeleg krav.
Det er også i strid med alle andre folkerettslege løysingar etter ein krig. Europakartet hadde sett annleis ut om slike prinsipp skulle vore gjennomførde etter Den andre verdskrigen. At palestinaarabrane sine internasjonale venner ikkje stoppar dette spelet, er eit stort tankekors!
Israel blei oppretta som jødisk stat etter FN-vedtaket i 1947. Arabarne gjekk til krig dagen etter at staten blei proklamert den 14. mai 1948. Israel skulle bort som jødisk stat!
Denne folkerettstridige posisjonen har arabarne halde fast på heile vegen etter. Slik sett er det lite nytt under sola. I historisk perspektiv er dette underleg. Det kan vera grunn for å minna om sanningar som ofte blir gløymde i dag: Det britiske mandatet, Balfourerklæringa (1917), San Marino (1921) og Folkeforbundet sitt vedtak i 1922.
Intensjonen om ein arabisk og ein jødisk stat, blei ført vidare med at arabarane under leiing av Abdullahfamilien (les: Transjordan, nå Jordan) fekk over tre fjerdedelar - 76 prosent av området. Seinare krev ein så større del til arabarne av resten, pluss at jødane sitt område heller ikkje skal få vera ein jødisk stat! Eg seier rett ut: Forstå det den som kan!
Artikkelen fortsetter under annonsen.
Eg har i denne spalta fleire gonger synt til dokumentasjon frå den jødiske organisasjonen som overvaker propagandaen i palestinske medier, Palestinian Media Watch. Her burde norske TV stasjonar, aviser og NTB følgja med.
Dagleg avdekkar dei korleis palestinaarbisk hatpropaganda blir spydd ut. Det aller værste er den hatideologien som dagleg inndoktrinerer og manipulerer born og unge. Eit nyleg døme: Eit barn blir spurt på TV om kva ho vil bli når ho blir stor? Jo, ho vil bli politi. - Då kan ho skyta og drepa alle jødar!
Liket av ein sjølvmordsbombar Izz Al-Din Al-Mastri som drap 15 sivile jødar i ein pizzarestaurant i Jerusalem, blei nyleg heidra med millitær æresgravferd. Overskrifta var denne: Ein martyrs bryllaupsvigsle til 72 jomfruer i Paradis.
Eg ser i avisene at fleire av palestinaarabane sine venner kjem med råd til statsminister Erna Solberg om kva ho bør fortelja Israels president Simon Peres når han nå kjem til Noreg.
Kanskje dei skulle feia for eiga dør, og kviskra sine palestinaarabiske venner nokre sanningsord i øyro?
Karl Johan Hallaråker
teolog og forfattar